आरुघाट, लार्के सडकको खोर्लाबेसी–तातोपानी खण्डमा सुख्खा पहिरो, आवतजावत ठप्प

साझापाना २०७९ जेठ ११ गते ११:५२ मा प्रकाशित

गोरखा । मंगलबार राती झरेको सुख्खा पहिरोले मनास्लु पदमार्ग अवरुद्ध भएको छ । धार्चे ३ खोर्लाबेसी र तातोपानीको बीच लुस्य्राङ खोलामा झरेको पहिरोले बाटो अबरुद्ध भएको धार्चे गाउँपालिकाका अध्यक्ष लक्ष्मण गुरुङले जानकारी दिए ।

बाटो अबरुद्ध हुँदा धार्चे गाउँपालिका र चुमनुब्री गाउँपालिकाका बासिन्दा तथा पर्यटक आवतजावत गर्न कठिनाइ भएको छ । साथै उत्तरी गोरखाका लागि खाद्यान्न लगायतका सामान ढुवानी गर्न जीप तथा खच्चड समेत रोकिएको छ ।

‘हिँजो बेलुका र राती दुईपटकसम्म सुख्खा पहिरो झरेको रहेछ’, उनले भने, ‘नेपाली सेनाले सडक निर्माण गर्ने क्रममा बम बिस्फोट गरेर पहरा फुटाउँदा अड्केका ढुंगाहरु सडकमा झरेका छन् । सडक पनि तल भासिएको छ । तलबाट पनि पर्खाल लगाउनु पर्ने भएको छ, माथि पनि थप बिस्फोट गरेर खोल्नु पर्ने भएको छ ।’ अबरुद्ध बाटो तत्काल खुलाउन नेपाली सेनाको सडक निर्माण कार्यदलका प्रमुख मेजर विनोद भट्टसित छलफल भएको उनले बताए ।

बेनिघाट, आरुघाट, लार्के सडक अन्तर्गतको सडक पहिरिएको हो । सो सडकको दोभानसम्म जीप चल्ने गरेको थियो ।

क्याटेगोरी : स्थानीय
ट्याग : ##गोरखा