वडावासीलाई उत्पादनसँग जोड्न च्याउ खेती

साझापाना २०८१ पुस २३ गते १३:५८ मा प्रकाशित

बाँकेको खजुरा गाउँपालिका वडा नम्बर २ सीतापुरले व्यावसायिक खेतीतर्फ किसानलाई आकर्षित गर्ने उद्देश्यले वडामै च्याउ खेती गरी बिक्री वितरण सुरु गरेको छ ।

वडा अध्यक्ष धनराम वली क्षेत्रीले घरमै बसेर च्याउ लगायतका कृषि उत्पादनबाट राम्रो आम्दानी गर्न सकिन्छ भनेर वडावासी किसानलाई सन्देश प्रवाह गर्ने उद्देश्यले च्याउ खेती सुरु गरिएको बताउनुभयो ।

पहिलो पटक किसानबाट उत्पादित च्याउ बिक्री सुरु गरिएको वडाध्यक्ष वलीले बताउनुभयो । प्रति किलो १२० रुपियाँको दरले च्याउ बिक्री भइरहेको उहाँको भनाइ छ । पाँच सयभन्दा बढि पोका भएकाले करिब २५ क्विन्टल च्याउ उत्पादन हुने अनुमान गरिएको छ ।

वडाध्यक्ष वलीले भन्नुभयो, ‘‘वडाले उत्पादन गरेको च्याउ भएकाले बजार मूल्यभन्दा सस्तोमा बिक्री गरिएको छ । च्याउ खेतीको निगरानी लगायतका प्राविधिक व्यवस्थापन कृषि शाखाले गरेको छ । बजेट व्यवस्थापन वडा कार्यालयबाट भएको छ ।’’

टनेलमा च्याउ खेती भएकाले सामान्य रेखदेखको काम वडाका जनप्रतिनिधि र कर्मचारीको टोलीले गरेको हो ।

वडाले गरेको च्याउ खेतीमार्फत आम वडावासीमा सकारात्मक सन्देश गई उत्पादनसँग आम वडावासीलाई जोड्न सहज हुन्छ भनेर वडाले च्याउ खेती गरेको वडाध्यक्ष वलीले बताउनुभयो ।

वडाले व्यवसायका लागि भन्दा पनि उत्पादनसँग वडावासीलाई जोड्न च्याउ खेती गरिएको जनाएको छ ।

क्याटेगोरी : वातावरण-कृषि
ट्याग : #वडावासीलाई उत्पादनसँग जोड्न च्याउ खेती